Listasafn Reykjanesbæjar óskar öllum gleðilegs nýs árs og minnir á síðustu sýningarhelgi sýninganna Ferðalangur - Kristinn Már Pálmason og Huglendur - Bjarni Sigurbjörnsson.

 

 

Ferðalangur – Kristinn Már Pálmason

Sýningin er ferðalag um myndlistarferil Kristins Más Pálmasonar, en meirihluti verkanna er gjöf listamannsins til Listasafns Reykjanesbæjar.

Myndverk Kristins takast á við frumspekilega brotakennda hugmynd skynseminnar um skapara heimsins, þar sem hvert tákn er sjálfstæð eining með sitt eigið þyngdarafl og sinn sérstæða lofthjúp.

Sýningarstjóri er Helga Þórsdóttir.

 

 

Huglendur - Bjarni Sigurbjörnsson

Fyrir Bjarna Sigurbjörnsson er myndflöturinn auðn sem þarf að kveikja til lífs og merkingar. Með pentskúfi, en án fyrirhyggju, markar hann fyrir striki eða stroku; sérhvert þessara ummerkja er vitnsburður um líkamlegt inngrip hans í veruleika myndflatarins, ekki tilraun til að draga upp „mynd“ af einhverju sem við teljum okkur þekkja í raunheimi.

Sýningarstjóri er Aðalsteinn Ingólfsson.

 

 

Sýningarnar eru styrktar af Safnasjóði og Stapaprenti.

 

Huglendur og Ferðalangur standa til 5. janúar 2025.

 

Ljósmynd: Vigfús Birgisson.